Bilanci i dhunës në protestë: 14 efektivë të lënduar dhe 35 persona të shoqëruar nga Policia

Pas tensioneve dhe akteve të dhunës të regjistruara gjatë tubimit, Policia e Shtetit ka dalë me një reagim zyrtar, ku kërkon ndalimin e menjëhershëm të sulmeve të drejtuara ndaj forcave të rendit dhe institucioneve, si dhe vandalizmit ndaj pronës publike e private. Sipas informacionit zyrtar nga uniformat blu, përplasjet dhe sulmet e vazhdueshme gjatë orëve të protestës kanë rezultuar në plagosjen e 14 punonjësve të Policisë. Ndërkohë, strukturat e sigurisë po punojnë intensivisht për identifikimin dhe kapjen e personave të maskuar që kanë kryer akte dhune, ndërsa deri më tani janë shoqëruar 35 shtetas. Në thirrjen e saj drejtuar qytetarëve, Policia ka kërkuar nga protestuesit që të distancohen prerazi nga elementët e dhunshëm, duke theksuar se sulmet ndaj efektivëve dhe shkatërrimi i mjediseve nuk përkojnë aspak me parimet e një proteste paqësore. “Kjo dhunë duhet të ndalet menjëherë!”, thuhet shprehimisht në njoftimin e Policisë, e cila ka shtuar se duhet t'i jepet fund rrezikimit të jetës së vetë punonjësve të rendit dhe qytetarëve të tjerë. Autoritetet kujtojnë se ligji garanton të drejtën për të protestuar, por kjo e drejtë nuk mund të shërbejë kurrsesi si mburojë për shkatërrime apo sjellje kriminale. Në fund të deklaratës, Policia ka paralajmëruar se çdo person përgjegjës do të identifikohet dhe do të mbajë përgjegjësi para ligjit, duke u bërë thirrje qytetarëve të mos lejojnë që tubimi të degjenerojë në skena përplasjesh.