Shtrëngimi i masave: Bashkimi Evropian shqyrton ndalimin total të udhëtimeve për shtetasit rusë

Bashkimi Evropian ka nisur shqyrtimin e disa mekanizmave të rinj për të frenuar hyrjen e shtetasve rusë në territorin e bllokut, ku opsioni më ekstrem përfshin ndalimin e plotë të çdo lloj udhëtimi joesencial brenda zonës Shengen. Ky hap vjen si pasojë e shqetësimeve të ngritura nga Brukseli dhe disa qeveri anëtare se individë me status diplomatik ose me viza turistike po shfrytëzohen për të kryer sulme hibride brenda vendeve evropiane. Së fundmi, autoritetet në Gjermani zbuluan se personi kryesor i dyshuar për një sulm me dronë në aeroportin e Lajpcigut gjatë muajit gusht – incident që solli bllokim të ndjeshëm të trafikut ajror – posedonte shtetësi të dyfishtë bjelloruse dhe ruse, ndërsa kishte hyrë në BE përmes një vize turistike Shengen të lëshuar nga Italia. Në një dokument të brendshëm politikash të presidencës së BE-së, shqyrtohen skenarë të ndryshëm për trajtimin e vizave të shtetasve rusë, duke vlerësuar se zgjidhja më afatgjatë dhe efektive do të ishte vendosja e kufizimeve të unifikuara që ndalojnë udhëtimet joesenciale për kombësi të caktuara. Dokumenti në fjalë nënvizon se një hap i tillë do të kërkonte ndryshime formale në Kodin e Vizave të BE-së, të cilat duhet të miratohen nëpërmjet procedurës së shumicës së cilësuar, që kërkon mbështetjen e 55 për qind të shteteve anëtare që përfaqësojnë 65 për qind të popullsisë së bllokut. Ponëse një rishikim më i gjerë i Kodit të Vizave mund të ndodhë gjatë këtij viti, disa vende anëtare, kryesisht në Evropën Jugore, shfaqen ende të rezervuara për ndërprerjen totale të kontakteve të drejtpërdrejta mes qytetarëve të tyre dhe atyre rusë. Kujtojmë se menjëherë pas nisjes së agresionit rus në shkallë të plotë kundër Ukrainës më 2022, BE-ja pezulloi marrëveshjen me Moskën për lehtësimin e vizave, e cila garantonte procedura më të shpejta dhe tarifa më të ulëta për hyrje të shumëfishta. Paralelisht, Brukseli u pat drejtuar shteteve anëtare udhëzime jodetyruese për t'i dhënë përparësi kërkesave për të ashtuquajturat udhëtime esenciale, duke përfshirë rastet humanitare, aktivistët e shoqërisë civile, disidentët politikë, gazetarët e pavarur dhe bashkimin familjar. Duke qenë se këto udhëzime nuk ishin të detyrueshme, çdo shtet anëtar ka ruajtur autonominë e plotë në vendimmarrje, duke krijuar një qasje të copëzuar në mbarë Evropën. Derisa vendet e krahut lindor të BE-së që kufizohen me Rusinë kanë vendosur kritere tejet rigoroze, shtetet e Evropës Jugore kanë mbajtur një qasje më liberale për të tërhequr turistë gjatë sezonit veror. Gjatë vitit 2025 u regjistrua një shifër rekord prej 477.878 vizash turistike të lëshuara për shtetasit rusë që nga fillimi i luftës, me pjesën dërrmuese të miratuar nga Greqia, Italia, Franca dhe Spanja. Derisa të arrihet një konsensus përfundimtar për ndalimin e plotë të hyrjeve, Bashkimi Evropian po bashkërendon veprimet në disa drejtime për të reduktuar fluksin e vizitorëve nga Rusia, duke synuar kufizimin e lëvizjeve për ish-luftëtarët dhe profilizimin e rreptë të rreziqeve të sigurisë.