Goditje e madhe e krimit kibernetik: MPB dhe FBI shkatërrojnë tregun e errët “OLVX“, kallëzim penal ndaj 20-vjeçarit nga Tetova

Ministria e Punëve të Brendshme (MPB), në bashkëpunim të ngushtë me Byronë Federale e Hetimit (FBI), ka kurorëzuar me sukses një operacion të përbashkët kundër krimit kibernetik, duke identifikuar dhe neutralizuar administratorin e platformës ilegale “OLVX“. Ky treg digjital shërbente për tregtimin e të dhënave personale të cënuara, fjalëkalimeve dhe mjeteve të ndryshme për kryerjen e veprave penale kompjuterike. Sektori për Krim Kompjuterik dhe Forenzikë Digjitale pranë MPB-së ka dorëzuar kallëzim penal në Prokurorinë Themelore Publike në Tetovë ndaj shtetasit E.A. (20) nga fshati Reçicë e Madhe. I riu dyshohet për kryerjen e veprave penale të „mashtrimit kompjuterik“, „keqpërdorimit të të dhënave personale“, si dhe „prodhimit dhe shpërndarjes së pornografisë së fëmijëve“. Sipas njoftimit zyrtar, aksioni lindi si rezultat i inteligjencës digjitale të siguruara nga FBI-ja, të cilat i hapën rrugën një hetimi të përbashkët dhe të sinkronizuar për të zbardhur aktivitetet e paligjshme që zhvilloheshin nëpërmjet platformës “OLVX“. Provat e mbledhura dëshmojnë se gjatë periudhës 2023–2025, i dyshuari ka drejtuar domene dhe ueb-faqe që funksiononin si një treg i zi online. Kjo platformë ofronte shitblerjen e të dhënave të konfiskuara, softuerëve keqdashës dhe shërbimeve të tjera në shërbim të hakerëve dhe kriminelëve kibernetikë. Baza e klientëve të këtij tregu ilegal përbëhej nga individë të përfshirë në aktivitete keqdashëse digjitale, të cilët përdornin ueb-faqen për të blerë dhe shitur kredenciale qasjeje në llogari personale dhe rrjete të ndryshme të viktimave. Gjatë ekzistencës së saj, në këtë platformë janë ofruar për shitje më shumë se 1.500 çelësa qasjeje të vjedhura. Hetimet gjithashtu kanë nxjerrë në pah se, përgjatë viteve 2025–2026, i dyshuari ka menaxhuar edhe një grup tjetër ilegal online të quajtur „ONEMILI“, i vendosur në aplikacionin e mesazheve „Telegram“. Përmes këtij grupi shpërndaheshin shërbime dhe mjete për sulme kompjuterike, përfshirë edhe skema mashtrimi për rikthimin e paligjshëm të fondeve financiare. Krahas kësaj, autoritetet kanë siguruar prova të pakundërshtueshme se përmes platformës „Telegram“, i riu ka siguruar dhe ruajtur për qëllime personale materiale që përfshijnë abuzimin seksual të të miturve. Ky operacion përbën ndërmarrjen e parë të përbashkët të koordinuar në fushën e sigurisë kibernetike mes MPB-së dhe FBI-së, duke shënuar një moment kthesë në ngritjen e bashkëpunimit ndërkombëtar për goditjen e krimit të organizuar digjital. Nga Departamenti i Policisë theksojnë se Sektori për Krim Kompjuterik dhe Forenzikë Digjitale do të vijojë me përkushtim operacionet parandaluese dhe ndëshkimore kundër cënimit të hapësirës kibernetike, duke garantuar mbrojtjen e të dhënave personale dhe sigurinë e qytetarëve. Sipas ministrisë, partneriteti strategjik me FBI-së konfirmon domosdoshmërinë e koordinimit global kundër krimit transnacional, duke përcjellë mesazhin e qartë se bota digjitale nuk do të shndërrohet kurrë në një strehë të sigurt për shkelësit e ligjit.