Nga vitet e arta te Prishtina te miqësitë e paharrueshme: RRëfimi emocional i ish-portierit Rade Zallad

Ish-portieri i njohur, Rade Zallad, i cili mbrojti ngjyrat e klubit të futbollit Prishtina gjatë edicionit 1985–1986 nën udhëheqjen e kapitenit legjendar Fadil Vokrri, ka evokuar kujtime të paharrueshme nga ajo periudhë, duke shprehur krenari të thellë për kohën e kaluar në kryeqytetin e Kosovës. Gjatë një rrëfimi ekskluziv dhënë gazetarit Reshat Ibraimi në “TV Open”, Zallad u shpreh se ende emocionohet kur kujton atmosferën e atyre viteve, ku tribunat e stadiumit ishin gjithmonë të mbushura plot. Ai solli në vëmendje grupin fantastik të lojtarëve, ku krahas Vokrrit bënin pjesë edhe figura të tjera si Zoran Batroviq dhe Skënder Shengyli, me këtë të fundit që u takua pas katër dekadash. Duke folur për sukseset e atëhershme, ish-portieri kujtoi se Prishtina renditej e pesta në ish-Jugosllavi, duke arritur të mposhtë gjigandët e kohës si Hajdukun, Partizanin e Beogradit dhe Cërvena Zvezdën në një konkurrencë jashtëzakonisht të fortë, ndërsa ndaj Dinamos dhe Rijekës ndeshjet u mbyllën në barazim pa gola, për të cilat përmendi një marrëveshje të brendshme mes Fadil Vokrrit dhe trajnerit të njohur kroat, Miroslav 'Ćiro' Blažević. Zallad gjithashtu zbuloi se ruan lidhje të ngushta me disa nga ish-bashkëlojtarët e tij shqiptarë. Ai theksoi se komunikon rregullisht me Jusuf Tortoshin, me të cilin ka luajtur së bashku te skuadra turke Eskişehirspor, ndërsa nuk la pa përmendur dhe përshëndetur edhe mikun e tij të dikurshëm nga kombëtarja e të rinjve, Agim Canën. Në fund të rrëfimit të tij, ish-portieri shprehu keqardhje të madhe për ndarjen e parakohshme nga jeta të legjendës Fadil Vokrri, duke e cilësuar atë si një futbollist të jashtëzakonshëm që la gjurmë të pashlyeshme jo vetëm në futbollin e Kosovës, por edhe te Partizani i Beogradit, ku pati një karrierë të suksesshme.