Goditje e rëndë për Real Madridin: Vinicius merr katër ndeshje pezullim dhe humbet ‘El Clásicon’

Ylli i Real Madridit, Vinicius Junior, është ndëshkuar zyrtarisht me katër ndeshje mosmarrjeje pjese nga Komiteti Spanjoll i Disiplinës, pas ndëshkimit me karton të kuq në takimin e së shtunës kundër Villarrealit. Sulmuesi nga Brazili do të jetë i detyruar të mungojë në katër takimet e ardhshme të “Los Blancos”, duke përfshirë sfidat ndaj Sevillas, Valencias, Racingut dhe mbi të gjitha, derbin e madh “El Clásico” kundër Barcelonës, i programuar për t'u zhvilluar më 25 tetor në stadiumin “Camp Nou”. Përjashtimi i 24-vjeçarit erdhi pas një incidenti të ndodhur në fushë me lojtarin Nathan Saliba, të cilit i tërhoqi flokët gjatë një aksioni që fillimisht u finalizua me gol për madrilenët. Megjithatë, pas sinjalizimit nga dhoma e VAR-it dhe rishikimit të pamjeve në monitor nga kryesori Isidro Díaz de Mera, goli u anulua dhe sulmuesi u ndëshkua me karton të kuq. Sipas vendimit zyrtar, sanksioni prej katër ndeshjesh është ndarë në dy pjesë: dy ndeshje pezullim për sjellje të dhunshme jashtë duelit për topin, si dhe dy të tjera për reagimin e ashpër dhe protestat ndaj gjyqtarit pas marrjes së kartonit të kuq. Në procesin e shqyrtimit, drejtuesit e Real Madridit kishin paraqitur ankesë për të kundërshtuar ndëshkimin, duke argumentuar se kontakti me flokët e kundërshtarit ishte i rastësishëm dhe se sulmuesi ishte i fokusuar te faza sulmuese. Por, organi disiplinor e ka rrëzuar këtë mbrojtje, duke theksuar se provat video mbështesin plotësisht raportin e arbitrit dhe vërtetojnë se veprimi është kryer kur topi nuk ishte në kontest mes lojtarëve. Gjithashtu, në vendim përmendet qartë se pas ndëshkimit, braziliani ka shfaqur një sjellje agresive në shenjë proteste, duke bërë që të ndërhyjnë shokët e skuadrës për ta larguar dhe qetësuar. Për shkak të këtyre dy shkeljeve të veçanta, Komiteti vendosi masën e dënimit me nga dy ndeshje për secilën, duke e çuar totalin në katër takime pezullim. Kujtojmë se menjëherë pas ndeshjes, Vinicius kishte shprehur pendesën e tij përmes një kërkesëfaljeje drejtuar bashkëlojtarëve dhe mbështetësve të klubit, për shkak se e la skuadrën me një lojtar më pak në fushë.