Në tetor nisin ndërhyrjet teknike, kur rikthehet në punë teleferiku i Shkupit?

Vizitorët dhe qytetarët e Shkupit do të duhet të presin edhe pak për t'i dhënë fund bllokimit të teleferikut, pasi ekspertët nga kompania austriake "Doppelmayr" pritet të zbarkojnë në kryeqytet gjatë muajit tetor për të nisur fazën e riparimeve dhe kontrolleve të detajuara. Sistemi i transportit ajror u la jashtë funksionit që në muajin maj, si masë paraprake pas zbulimit të disa defekteve gjatë inspektimeve të rregullta. Për të zgjidhur këtë situatë, autoritetet kanë arritur një marrëveshje zyrtare me prodhuesin dhe instaluesin e këtij sistemi. Financiarisht, projekt-oferta e paraqitur nga "Doppelmayr" kap shifrën e 43,35 milionë denarëve të llogaritura me TVSH, ndërkohë që tavani maksimal i kontratës është caktuar në 53,1 milionë denarë, gjithashtu përfshirë TVSH-në. Kjo paketë mbështetëse përfshin sigurimin e pjesëve të reja të ndërrimit, vendosjen e tyre, shërbimet e mirëmbajtjes, si dhe testimin përfundimtar të pajisjeve. Nga Ndërmarrja Publike e Transportit në Shkup kanë garantuar se kabinat nuk do të vihen sërish në qarkullim pa u plotësuar plotësisht të gjitha standardet e paracaktuara të sigurisë dhe teknike.