Gjigantët e Premier Ligës në alarm: Bournemouthi vendos çmimin astronomik për Alex Scott

Mesfushori i talentuar Alex Scott mund të ndryshojë ambient gjatë merkatos së dimrit, pasi drejtuesit e Bournemouthit kanë ndryshuar qëndrim dhe janë të gatshëm të shqyrtojnë ofertat për shitjen e tij në muajin janar, për sa kohë ato të jenë financiarisht bindëse. Gjatë muajve të verës, klubi anglez bëri rezistencë duke hedhur poshtë çdo tentativë dhe interesim për lojtarin, ku më këmbëngulësi ishte Chelsea, skuadër e cila e kishte vendosur në shënjestër që prej muajit qershor. Përveç klubit londinez, situata e 22-vjeçarit po ndiqet me vëmendje të madhe edhe nga dy skuadrat e tjera të kreut, Arsenal dhe Liverpool, të cilat mbeten në gatishmëri për të ndërhyrë. Pavarësisht hapjes së dyerve për një largim të mundshëm, Bournemouthi nuk ka ndërmend ta lëshojë lehtë yllin e tij, duke vendosur një çmim jashtëzakonisht të lartë në treg. Burimet sugjerojnë se klubi mund të kërkojë shifrën mbi 100 milionë funte për të lejuar largimin e tij gjatë afatit kalimtar të janarit. Diskutimet e zhvilluara së fundmi mes drejtuesve të klubit dhe agjentëve të lojtarit kanë intensifikuar spekulimet rreth të ardhmes së tij, duke shtuar gjasat për një lëvizje të bujshme në muajt e ardhshëm.