Paradoksi i Juventusit: Dominon në statistika dhe krijimtari, por mbetet i gjashti në Serie A

Çfarë do të ndodhte nëse tabela e Serie A nuk do të vendosej nga golat realë në fushë, por nga volume i rasteve të prodhuara, pastërtia e goditjeve dhe soliditeti mbrojtës? Sipas statistikave të avancuara nga platforma e specializuar Understat, Juventusi do të ishte lider i padiskutueshëm i kampionatit me 14.65 pikë të pritshme, duke lënë pas Interin me 13.94, Romën me 13.24 dhe Napolin me 11.69 pikë. Ky është një kontrast i thellë me realitetin e fushës, pasi skuadra e drejtuar nga Luciano Spalletti pozicionhet aktualisht në vendin e gjashtë, me një distancë prej pesë pikësh nga kreu që mbahet nga Interi dhe Lazio. Çështja kryesore që po i kushton shtrenjtë bardhezinjve është mungesa e theksuar e cinizmit dhe konkretizimit para portës kundërshtare. Gjatë gjashtë javëve të para të sezonit, ekipi nga Torino ka regjistruar shifrën më të lartë të prekjeve të topit në zonën e rrezikshme sulmuese, por paradoxalisht renditet në vendin e fundit për sa i përket përqindjes së goditjeve të ekzekutuara nga brenda zonës së rreptësisë. Megjithëse skuadra prodhon volum të lartë loje, shpesh ajo humbet qartësinë duke përfunduar në tentativa të ndërlikuara dhe me pak shanse reale për të tundur rrjetën. Në krahun tjetër, treguesit mbrojtës paraqiten më të suksesshëm. Bazuar në metrikat e rrezikshmërisë, kundërshtarët duhej të kishin realizuar vetëm 2.92 gola, ndërkohë që Juventusi ka pësuar pesë deri më tani. Megjithatë, reparti i avancuar vazhdon të ngrejë alarmin: plot pesë nga nëntë golat e shënuar nga bardhezinjtë, që përbëjnë 56 për qind të totalit, janë realizuar vetëm pas minutës së 80-të të ndeshjeve. Për ilustrim, në sfidën kundër Cagliarit, Juventusi provoi 22 herë drejt portës, ku 19 prej këtyre tentativave prodhuan vetëm 0.58 gola të pritshëm. Në total, pas gjashtë javësh kampionati, skuadra ka tentuar 110 goditje, prej të cilave 39 kanë përfunduar në kuadrat, me një bilanc prej 11.61 golash të pritshëm. Mesatarja prej 0.11 xG për çdo goditje është ndjeshëm më e ulët krahasuar me Milanin dhe Romën që regjistrojnë 0.15, apo me Interin, Lazion dhe Napolin që mbajnë mesataren në kuotën e 0.14. Të gjitha këto shifra dëshmojnë qartë se Juventusi zotëron aftësinë për të ndërtuar aksione dhe për të dominuar, por çedon në finalizim. Nëse nuk përmirëson saktësinë dhe cilësinë në metrat e fundit, grupi i Spallettit rrezikon të mbetet kampion vetëm në letrën e statistikave, ndërkohë që në fushën e lojës do të vazhdojë të vuajë për të kapur rivalët.