Beteja me kancerin e gjirit, Mimoza Kusari-Lila tregon momentin e diagnostikimit: Zbulimi i hershëm shpëton jetë

Kryetarja e Grupit Parlamentar të Lëvizjes Vetëvendosje, Mimoza Kusari-Lila, ka ndarë me publikun rrëfimin e saj prekës përballë kancerit të gjirit, duke vënë në pah domosdoshmërinë e diagnostikimit të hershëm dhe ngritjes së vetëdijes publike për kujdesin ndaj shëndetit. Përmes një publikimi zyrtar, ajo ka zbuluar se në muajin tetor të vitit 2024 ishte diagnostikuar me kancer të gjirit në fazën e tij të parë. Deputetja ka shpjeguar se ka zgjedhur të rrëfejë hapur këtë sfidë personale për të përcjellë mesazhin mbi vlerën e kontrolleve mjekësore rutinë, besimit në vetvete dhe guximit të nevojshëm për të përballur këtë sëmundje të rëndë. “E dija që, kur kanceri zbulohet në stad të hershëm, mundësitë për shërim janë shumë më të mëdha”, ka shkruar ajo në mesazhin e saj. Gjatë ditës së sotme, Kusari-Lila ishte e ftuar e Bordit të Studentëve të RIT Kosova, ku bashkëbisedoi me të rinjtë në kuadër të muajit të ndërgjegjësimit, njohur si Tetori Rozë, duke u ndalur te rëndësia e thyerjes së tabuve rreth kësaj sëmundjeje. Ajo ka potencuar se paragjykimet dhe heshtja duhet të marrin fund, ndërsa sfida e çdo gruaje me këtë gjendje shëndetësore duhet të kthehet në kauzë dhe angazhim mbarëshoqëror.