Kryetarja e Kuvendit, Albulena Haxhiu, zhvillon takimin përmbyllës me diplomaten greke Heleni Vakali

Kryetarja e Kuvendit të Kosovës, Albulena Haxhiu, ka zhvilluar sot një takim lamtumirës me Shefen e Zyrës Ndërlidhëse të Greqisë në Kosovë, Heleni Vakali, me rastin e përfundimit të misionit të saj diplomatik. Gjatë këtij takimi, kreu i Kuvendit i ka shprehur mirënjohjen diplomates Vakali për kontributin, bashkëpunimin e frytshëm dhe angazhimin e treguar përgjatë gjithë periudhës së shërbimit të saj në vendin tonë. Po ashtu, gjatë bisedës është vënë theksi te gatishmëria e dyanshme për të intensifikuar partneritetin dhe për të ngritur në një nivel më të lartë marrëdhëniet bilaterale ndërmjet Kosovës dhe Greqisë. “Sot pata kënaqësinë ta mirëpres në një takim lamtumirës Shefen e Zyrës Ndërlidhëse të Greqisë në Kosovë, znj. Heleni Vakali. E falënderova për bashkëpunimin dhe përkushtimin e saj gjatë shërbimit në Kosovë. Shprehëm vullnetin për të thelluar bashkëpunimin dhe për të avancuar më tej marrëdhëniet ndërmjet dy vendeve tona”, ka shkruar ndër të tjera Haxhiu.