Përshkallëzohet situata në Tiranë: Protestuesit godasin ambientet e një banke, tensionohet tubimi studentor

Protesta e studentëve dhe gjimnazistëve në kryeqytet, e cila nisi që në orët e para të mëngjesit përmes bojkotimit të procesit mësimor, ka shënuar momente të reja tensioni. Situata është acaruar në Rrugën e Durrësit, ku një grup të rinjsh, disa prej të cilëve të maskuar, kanë ndërmarrë veprime të dhunshme duke tentuar të dëmtojnë derën dhe xhamat e një banke me mjete rrethanore dhe goditje me këmbë. Kjo valë protestash vjen vetëm një ditë pas përplasjeve të forta me efektivët e rendit. Mësimi u la në gjysmë nga studentët e Universitetit të Mjekësisë, Fakultetit Ekonomik, Fakultetit të Drejtësisë dhe Universitetit Politeknik, të cilët braktisën auditorët dhe marshuan drejt Ministrisë së Arsimit. Lëvizjes pritet t'i shtohen edhe kontingjente studentore nga qytetet e Elbasanit dhe Durrësit, ndërsa thirrjet në rrjetet sociale kanë nxitur grumbullimin e sërishëm të qytetarëve në Rrugën e Durrësit. Në këtë valë pakëqësie janë përfshirë edhe nxënësit e gjimnazit “Partizani”, të cilët kanë braktisur bankat e shkollës. Gjatë tubimit të tyre, disa prej nxënësve bllokuan përkohësisht qarkullimin pranë institucionit arsimor duke vendosur kosha mbeturinash në rrugë dhe duke u vënë flakën atyre, ndërsa marshimet bllokuan edhe akse kyçe pranë Rrugës Bardhyl. Në një komunikatë zyrtare lidhur me trazirat e datës 13 tetor, Policia konfirmoi se ka vënë në pranga 16 persona, ndërsa ka nisur procedimin penal për 49 të tjerë pas tubimit të zhvilluar para Ministrisë së Arsimit. Sipas autoriteteve, protestuesit hodhën gurë, sende të forta, kapsolla dhe mjete zjarrvënëse si kokteje molotovi ndaj forcave të rendit dhe godinave shtetërore. Për pasojë, janë shënuar dëme materiale në Ministrinë e Arsimit, si dhe në Rrugën “Ded Gjon Luli”, ku u thye dera e Bashkisë së Tiranës dhe u vu zjarr në katin e parë të saj. Gjatë përplasjeve mbetën të plagosur gjashtë punonjës policie, ndërsa dëme pati edhe në biznese private, përfshirë një bankë të nivelit të dytë dhe një institucion mikrofinanciar. Prokuroria e Tiranës po drejton hetimet në vijimësi për zbardhjen e plotë të ngjarjeve, dokumentimin e dëmeve dhe identifikimin e personave të tjerë të implikuar në aktet e dhunës gjatë protestave.