Potenciali ekonomik si çelësi i së ardhmes për Luginën, mesazhi nga Bujanoci

Në qytetin e Bujanocit është mbajtur Konferenca e Katërt Ekonomike nën moton “Ekonomia shpëton Luginën”, një ngjarje e cila mblodhi së bashku ekspertë, prodhues, sipërmarrës dhe personalitete të biznesit vendor e të diasporës, për të diskutuar mbi mundësitë e zhvillimit dhe investimeve në Preshevë, Medvegjë dhe Bujanoc. Kjo ngjarje e rëndësishme u organizua nga Xhelal Mehmeti, kryetar i Unionit të Afaristëve “Vizioni-PMB”, në bashkëpunim të ngushtë me Komunën e Bujanocit të udhëhequr nga kryetari Arbër Pajaziti, si dhe në partneritet me Rrjetin Global Shqiptar që drejtohet nga Omer Nura. I pranishëm në këtë tubim ishte edhe profesori nga Presheva, Refik Hasani, i cili theksoi se Presheva, Medvegja dhe Bujanoci zotërojnë resurse të rëndësishme njerëzore e ekonomike, ndërsa pozita e tyre gjeografike si udhëkryq strategjik ofron kushte ideale për ta kthyer rajonin në një hapësirë me perspektivë të lartë zhvillimi. Sipas Hasanit, shkëmbimi i ideve dhe përvojave me afaristët e suksesshëm nga diaspora dëshmoi interesimin e lartë për të investuar në vendlindje, çka do të sillte hapjen e vendeve të reja të punës dhe do të siguronte një zhvillim të qëndrueshëm për trevën. Në fund të diskutimeve, u bë një thirrje e hapur drejtuar Prishtinës dhe Tiranës zyrtare që të ofrojnë mbështetje institucionale për iniciativa dhe projekte konkrete, me qëllim që rajoni të sigurojë mundësi më të mira për bizneset dhe brezin e ri.