Bllokimi i deponisë së Mirashit, Prishtina paralajmëron padi penale dhe akuzon Qeverinë për sabotim

Komuna e Prishtinës ka paralajmëruar ndërmarrjen e hapave ligjorë, duke paralajmëruar kallëzim penal lidhur me situatën e krijuar rreth mbylljes së deponisë së mbeturinave. Gjatë një konference për media, nënkryetarja e kryeqytetit, Besianë Musmurati, ka bërë të ditur se procesi i pastrimit dhe menaxhimit të mbeturinave është përballur me vështirësi serioze pas ndryshimit të orarit të punës në deponinë e Mirashit. Gjatë fjalës së saj, Musmurati ka theksuar se prej datës 18 tetor 2024, ministri i Financave, Hekuran Murati, po refuzon me dashje të zhbllokojë nisjen e një projekti madhor në bashkëpunim me Bankën Zhvillimore Gjermane, i destinuar për përmirësimin e gjendjes mjedisore në kryeqytet. Sipas saj, ky bllokim po pengon një financim prej 74 milionë eurosh, mjete këto që do të shërbenin për modernizimin e flotës përmes blerjes së 100 kamionëve të rinj dhe shpërndarjes së 10 mijë kontejnerëve të rinj për qytetarët. Nënkryetarja u shpreh se kryeqyteti po mbahet i izoluar dhe peng përmes veprimeve të motivuara politikisht tash e dy vite. Duke shtuar se administrata komunale nuk do të qëndrojë pasive ndaj këtij presioni, Musmurati përmendi emra konkretë, duke fajësuar zyrtarët qeveritarë për pengim të qëllimshëm dhe paralajmëroi masa të menjëhershme ligjore ndaj Dardan Velisë për veprimet e ndërmarra që çuan në mbylljen e deponisë.