Përshkallëzim i dhunës para Ministrisë së Arsimit: Sulme me molotovë dhe ndërhyrje e forcave të rendit

Një situatë e tensionuar është regjistruar këtë mesditë para godinës së Ministrisë së Arsimit, ku një grup protestuesish të maskuar kanë kryer akte vandalizmi, duke shkulur kangjellat mbrojtëse dhe duke hedhur mjete piroteknike, gurë e kokteje molotovi në drejtim të institucionit shtetëror. Tubimi ka nisur rreth orës 14:00, konform thirrjeve paraprake, pasi studentë nga Fakulteti i Ekonomisë, Universiteti Politeknik dhe Fakultetit të Mjekësisë braktisën auditoret për t'iu bashkuar lëvizjes protestuese. Këto zhvillime pasojnë protestën e datës 13 tetor, e cila gjithashtu u karakterizua nga incidente të rënda, përplasje fizike mes turmës dhe efektivëve të policisë, dëmtime të pronës publike dhe lëndime të personave të pranishëm. Gjatë tubimit të sotëm, protestuesit arritën të shkulnin rrethimin metalik dhe dëmtuan njërën nga portat hyrëse, duke krijuar mundësinë që një pjesë e tyre të futeshin brenda oborrit të ministrisë. Në vijim të tensioneve, persona me fytyra të mbuluara hodhën lëndë plasëse, gurë, vezë, mjete djegëse dhe pllaka guri si drejt fasadës së godinës, ashtu edhe ndaj punonjësve të policisë, duke shkaktuar thyerjen e xhamave të objektit. Për të vënë nën kontroll situatën dhe për të shpërndarë grupet e dhunshme, Policia e Shtetit ndërhyri duke përdorur gaz lotsjellës, spraj piperit dhe automjete me ujë të pozicionuara enkas për këtë qëllim. Autoritetet bënë të ditur se 16 persona janë vënë në pranga, ndërsa 49 të tjerë po ndiqen penalisht në gjendje të lirë. Si pasojë e përplasjeve, gjashtë persona pësuan dëmtime trupore dhe po trajtohen mjekësisht në Spitalin Universitar të Traumës. Të dhënat zyrtare nga Ministria e Shëndetësisë saktësojnë se tre prej të lënduarve janë qytetarë të rastësishëm dhe tre të tjerë protestues, ndërkohë që u lënduan edhe 6 efektivë policie.