Kryeministrja italiane Meloni ashpër kundër Uashingtonit: Lëvizja e Trump për naftën ruse përbën rrezik madhor

Kryeministrja e Italisë, Giorgia Meloni, ka cilësuar hapur si një hap “shumë të rrezikshëm” marrëveshjen e ndërmarrë nga presidenti amerikan Donald Trump lidhur me furnizimin e naftës ruse. Gjatë fjalës së saj në Senat, në prag të Samitit të Këshillit Evropian, shefja e ekzekutivit italian – e cila dikur shihej si një mbështetëse e ngushtë e kreut të Shtëpisë së Bardhë para se të shfaqeshin divergjencat mes tyre – vuri në dukje se shtrenjtimi i karburanteve nxitet kryesisht nga konfliktet e hapura në Iran dhe Ukrainë, duke hedhur hije dyshimi mbi logjikën e këtij vendimi amerikan. “Prandaj, rezultati i këtij vendimi është i pasigurt ndërsa rreziqet janë të qarta: legjitimimi për Moskën”, u shpreh Meloni, duke paralajmëruar për pasoja shqetësuese si “të ardhurat shtesë për të financuar luftën e saj dhe një dobësimi të levës së sanksioneve perëndimore”. Ajo shtoi se kjo marrëveshje mund të dërgojë sinjale “kontradiktore” në një periudhë kur shtetet perëndimore, përfshirë SHBA-në, janë angazhuar maksimalisht për t’i bërë presion presidentit rus Vladimir Putin drejt nisjes së negociatave për t’i dhënë fund luftës në Ukrainë, e cila vijon pandërprerje që nga viti 2022. Kryeministrja e Italisë kërkoi një angazhim shumë më aktiv të Bashkimit Evropian në procesin e paqes, duke u bërë thirrje vendeve anëtare të emërojnë një përfaqësues me autoritet të plotë dhe me mandat nga të 27 shtetet, në mënyrë që kontinenti i vjetër të ketë një zë unik në tryezën e bisedimeve. “Ne duhet të sigurojmë që Evropa të mos qëndrojë duarkryq”, përsëriti ajo me bindje. Në këtë linjë, ajo shprehu rezerva ndaj mundësisë që Franca, Gjermania dhe Mbretëria e Bashkuar të ndërmarrin iniciativa diplomatike nën të ashtuquajturin format E3 pa një autorizim kolektiv nga BE-ja, duke nënvizuar se çdo veprim i tillë duhet të ndërmerret vetëm në emër të gjithë bllokut. Nga ana e tij, Trump u ka bërë thirje Moskës dhe Kievit që të shmangin sulmet ndaj infrastrukturës energjetike të kundërshtarit, ndërsa javën e shkuar bëri me dije se Rusia do t'i rikthehet furnizimit të tregjeve ndërkombëtare me naftë si mundësi për të zbutur çmimet e larta, duke çuar në heqjen e përkohshme të sanksioneve amerikane ndaj karburantit rus. Prioritetet buxhetore të BE-së Duke e quajtur shtrenjtimin e energjisë si sfidën më të madhe për ekonominë e vendit të saj dhe mbarëvajtjen e sipërmarrjeve italiane, Meloni kërkoi një përgjigje të shpejtë dhe të unifikuar në nivel kontinental. Ajo rikonfirmoi qëndrimin e palëkundur të Romës lidhur me buxhetin e ardhshëm të bllokut evropian, duke bërë të qartë se Italia nuk do të pranojë asnjë pazar që cenon Politikën e Përbashkët Bujqësore (CAP), sektorin e peshkimit apo fondet e kohezionit. Edhe pse e pranoi synimin e unionit për të mbyllur një marrëveshje brenda këtij viti, ajo theksoi se Italia nuk do t'i japë mbështetje një akordi vetëm për t'i bërë ballë afateve kohore. “Ne do të nënshkruajmë një marrëveshje vetëm kur të jetë e drejtë për Italinë”, përfundoi Meloni.