Zelenskyy: Veprimet e Moskës dëshmojnë shpërfillje të hapur ndaj Uashingtonit dhe Donald Trumpit

Kreu i shtetit ukrainas, Volodymyr Zelenskyy, ka lëshuar një deklaratë të ashpër kundër Moskës këtë të mërkurë, pak para se të nisej drejt Britanisë së Madhe për një takim me Andy Burnham. Ai ka akuzuar autoritetet ruse se po tregojnë mungesë të plotë respekti ndaj Shteteve të Bashkuara dhe Presidentit Donald Trump, përmes vazhdimit të pandërprerë të ofensivës ushtarake. Shkak për këtë reagim të ashpër është bërë fakti se rreth 600,000 qytetarë kanë mbetur pa energji elektrike pas një breshërie sulmesh raketore në Kiev. Sipas presidentit ukrainas, gjatë natës forcat ruse lëshuan 39 raketa balistike dhe më shumë se 120 dronë shkatërrues, duke vënë në shënjestër rrjetin energjetik dhe infrastrukturën kritike në Kiev dhe Kharkiv. Zelenskyy nënvizoi se ky sulm me raketa balistike ishte planifikuar me paramendim dhe kishte për qëllim goditjen direkte të sektorit energjetik, i cili sipas tij mbrohet nga vetë armëpushimi i shpallur nga kreu i Shtëpisë së Bardhë. "Kjo ofensivë ishte plotësisht e qëllimshme dhe me karakter demonstrativ – Rusia kurrë më parë nuk ka shfaqur një shpërfillje kaq të hapur ndaj Shteteve të Bashkuara," u shpreh ndër të tjera ai. Ai shtoi se Moska nuk po i merr seriozisht thirrjet dhe qëndrimet e presidentit amerikan. Ndërkohë, autoritetet lokale konfirmuar se gjatë natës forcat ruse goditën gjithashtu një strukturë nafte në qytetin perëndimor të Lutskut. Andriy Razumovsky, zyrtar i qytetit, njoftoi se sulmi me dron shkaktoi një zjarr, pa dhënë detaje shtesë. Si pasojë e valës së fundit të sulmeve ruse në mbarë vendin gjatë natës së kaluar, numri i viktimave ka shkuar në të paktën gjashtë, sipas njoftimeve zyrtare. Kryetari i bashkisë së Kievit, Vitali Klitschko, dhe autoritetet energjetike konfirmuan se tre persona humbën jetën në kryeqytet, ku u regjistruan edhe ndërprerje të gjera të energjisë elektrike në disa lagje. Ndërkaq, zyrtarët rajonalë bënë të ditur se dy persona të tjerë vdiqën në rajonin qendror të Dnipropetrovskit, ndërsa një banor tjetër u vra në rajonin e Zaporizhias, në juglindje të vendit, teksa Moska vijon sulmet e saj në territore të ndryshme të Ukrainës.