“Metoda të ngjashme me regjimin e Millosheviçit”: Gazetari e padit RTK-në pas shkarkimit nga puna për shkak të postimeve në Facebook

Gazetari Ernest Luma ka bërë të publike se është shkarkuar nga detyra e tij në Radio Televizionin e Kosovës (RTK), një vendim ky që sipas tij është marrë për shkak të qëndrimeve të shprehura në rrjetet sociale. Luma, i cili dikur ka qenë ndër udhëheqësit kryesorë të protestave studentore në vitin 1997, ka njoftuar se tashmë i është drejtuar gjykatës dhe autoriteteve përkatëse ligjore për këtë çështje. Nëpërmjet një reagimi publik, ai ka bërë të ditur se padia ndaj transmetuesit publik është dorëzuar pas vendimit të datës 28 gusht, të cilin e cilëson si plotësisht të padrejtë. Sipas tij, shkarkimi erdhi pasi shkrimet e tij me përmbajtje sarkastike ndaj zhvillimeve politike në vend nuk u toleruan, duke çuar në nisjen e një procedure disiplinore nga ushtruesi i detyrës së kryeredaktorit të RTK-Radios dhe miratimin e mëvonshëm nga ushtruesi i detyrës së drejtorit të këtij mediumi. Luma ka theksuar se e gjithë procedura u krye brenda pak ditësh, pa argumente të detajuara dhe përmes aludimeve të shpejta se kinse ka shkelur ndonjë nen të rregullores së brendshme, ndërsa vendimi për ndërprerjen e marrëdhënies së punës i u dërgua përmes postës elektronike. Ai e ka krahasuar këtë formë largimi me praktikat e kohës së Millosheviçit. Gazetari ka shtuar se gjatë gjithë angazhimit të tij në RTK-Radio në pozita të ndryshme, është përpjekur t'i kryejë detyrat me përgjegjësi, profesionalizëm dhe paanësi. Megjithatë, ai ka insistuar se postimet në profilin e tij personal në Facebook nuk kanë lidhje me punën në medium, pasi aty nuk është përmendur kurrë RTK-ja dhe as nuk është përdorur emri i mediumit në fjalë. Në fund, Luma ka sqaruar se shkrimet e tij nuk kanë pasur për qëllim fyerjen apo linçimin e askujt, duke shtuar se reagimet e tij ishin thjesht opinione kreative dhe sarkastike, ndërkohë që sipas tij, punonjës të tjerë në RTK që shërbejnë si mbështetës të pushtetit dhe kritikë të opozitës nuk përballen kurrë me masa disiplinore.