Kanosja ndaj gazetarit Lirim Mehmetaj: Prokuroria kërkon paraburgim për ish-deputetin Gani Geci

Prokuroria Themelore në Prishtinë i është drejtuar Gjykatës Themelore në Prishtinë me kërkesën për caktimin e masës së paraburgimit ndaj ish-deputetit Gani Geci, i cili dyshohet për kanosjen e gazetarit Lirim Mehmetaj. Sipas dokumentit zyrtar të siguruar, incidenti ka ndodhur brenda hapësirave të redaksisë së portalit “Vox Kosova”, ku dyshohet se ish-deputeti ka ushtruar presion ndaj gazetarit për shkak të një shkrimi të publikuar në rrjetin social Facebook. Në bazë të dosjes së Prokurorisë, ngjarja dyshohet se është regjistruar më 11 tetor 2026, rreth orës 19:27, në zyrat e mediumit në kryeqytet. Shkas dyshohet të jetë bërë një postim i Mehmetajt lidhur me deputetin Fatos Geci. Pasi gazetari kishte refuzuar kërkesën për të fshirë ose modifikuar përmbajtjen, i dyshuari dyshohet se e ka kërcënuar drejtpërdrejt me fjalët: “Nëse nuk e hek postimin ose nuk e ndryshon, kena me u vra“. Në të njëjtën kërkesë bëhet e ditur se kërcënimi është përsëritur edhe përmes një tjetër formulimi: “Pash një Zot, mos na merr në qafë, ndërro postimin se na duhet me u vra“. Hetimet paraprake zbulojnë gjithashtu se tensionet kanë vazhduar edhe ditën e nesërme, më 12 tetor 2016. Ndërsa i dëmtuari po merrte pjesë si panelist në emisionin “Debat Plus”, Gani Geci kishte shkuar pranë objekteve të televizionit “Dukagjini”. Atje ai kishte realizuar një video në rrjetin social Tik-Tok për t’i sinjalizuar praninë e tij gazetarit, duke e pritur atë për afro dy orë jashtë studios. Organet e rendit vlerësojnë se këto veprime kanë pasur për qëllim detyrimin e të dëmtuarit dhe i kanë shkaktuar atij ndjenja të theksuara frike, ankthi dhe pasigurie. Për shkak të këtyre rrethanave, Gani Geci ngarkohet me dyshimin e arsyeshëm për kryerjen e veprës penale të “Kanosjes”, e cila sankcionohet sipas nenit 181, paragrafi 2 të Kodit Penal.