Apeli i Arta Bajramit për institucionet: Fëmijët me autizëm kanë nevojë për mbështetje reale, jo për mëshirë

Këngëtarja e njohur Arta Bajrami ka rikthyer sërish në qendër të vëmendjes të drejtat dhe sfidat me të cilat ballafaqohen fëmijët me autizëm, duke u bërë thirrje institucioneve shtetërore që të ndërmarrin veprime të menjëhershme për t'ua lehtësuar jetën atyre dhe familjeve të tyre. E pranishme si e ftuar në emisionin “Kosova Today”, ajo fillimisht përgëzoi presidenten e re për detyrën, ndërsa shpjegoi se menjëherë pas këtij zhvillimi kishte shfrytëzuar rrjetet sociale për të kërkuar vëmendje institucionale ndaj kësaj kategorie. Duke qenë vetë nënë e dy fëmijëve që i përkasin spektrit të autizmit, Bajrami bëri të ajetur se ka kërkuar që projektligji për fëmijët me nevoja të veçanta të jetë ndër prioritetet kryesore në agjendën e Kuvendit, duke nënvizuar domosdoshmërinë e një mbështetjeje të dedikuar për autizmin. “Unë jam zëri i shumë nënave që nuk dëgjohen”, u shpreh ndër të tjera artistja gjatë intervistës. Ajo shtoi se familjet që ballafaqohen çdo ditë me këto sfida nuk kërkojnë ndjenja keqardhjeje, por ndihmë të prekshme dhe përkrahje të sinqertë nga shteti. “Ne nuk kërkojmë mëshirë, nuk është nevoja me na ardh keq, nuk duhet me na lënë vetëm. Institucionet duhet me na ndihmu, sepse mbrapa një nëne, nuk dihet sa net i ka kaluar pa gjumë, si e ka kaluar ditën”, deklaroi ajo. Në përmbyllje të fjalës së saj, Bajrami ritheksoi se miratimi i këtij projektligji është jetik, në mënyrë që fëmijët me nevoja të veçanta të gëzojnë mbështetjen e merituar dhe prindërit e tyre të mos ndihen të vetëm përballë vështirësive të përditshme.