Goditje e rëndë ndaj medias në Turqi: Bastiset Halk TV, ndërpritet transmetimi dhe arrestohen 11 persona

Forcat e rendit në Turqi kanë ndërmarrë një aksion blic në zyrat qendrore të televizionit pro-opozitar Halk TV, duke çuar në ndërprerjen e menjëhershme të transmetimeve direkte dhe në vënien në pranga të 11 shtetasve. Si pasojë e këtij operacioni, sinjali televiziv i Halk TV, përfshirë edhe transmetimet live në platformën YouTube, janë ndërprerë plotësisht. Ky zhvillim shënon presionin më të freskët ndaj mediave kritike ndaj pushtetit dhe vjen vetëm dy javë pasi autoritetet bllokuan portalin e njohur dixhital T24 dhe rrjetet e tij sociale, me pretekstin e të astiturës “propagandë LGBT”. Përmes një njoftimi zyrtar për mediat vendase, institucioni i prokurorisë bëri të ditur se kishte prerë urdhër-arreste për 17 individë gjithsej. Prej tyre, 11 janë kapur dhe ndaluar në kuadër të hetimeve që po zhvillohen ndaj drejtuesit kryesor të televizionit, Cafer Mahiroğlu, i cili dyshohet për veprat penale të “ryshfetit”, “manipulimit të tenderëve” dhe “pastrimit të parave”. Po ashtu, autoritetet kanë vendosur sekuestro preventive mbi kompanitë që zotërohen bashkërisht ose menaxhohen nga Mahiroğlu, duke caktuar një administrator shtetëror për administrimin e tyre. Nga gjashtë personat e tjerë të shpallur në kërkim përmes urdhër-arresteve, katër ndodhen jashtë territorit turk, njëri gjendet në një institucion korrektues, ndërsa për të fundit kërkimet vijojnë ende. Vetë kreu i televizionit, Cafer Mahiroğlu, nuk figuron mes të ndaluarve pasi jeton jashtë vendit. Vitin e kaluar, Halk TV – televizion i cili është përballur shpesh me masa ndëshkimore dhe gjoba nga Autoriteti Turk i Rregullimit të Transmetimeve – ishte përballur gjithashtu me rrezikun e mbylljes përfundimtare për shkak të qëndrimeve të tij hapur kritike ndaj administratës së Presidentit Rexhep Tajip Erdogan.