Strategjia për Apelin e ish-krerëve të UÇK-së: Qeveria paralajmëron kujdes në hapat e parë pa dhënë afate konkrete

Ekzekutivi i Kosovës ka ndërmarrë hapat zyrtarë për ngritjen e një grupi punues, i cili do të merret me hartimin dhe koordinimin e strategjisë shtetërore lidhur me fazën e Apelit në Dhomat e Specializuara për ish-krerët e Ushtrisë Çlirimtare të Kosovës. Ministri për Punë, Familje dhe Vlera të Luftës Çlirimtare, Andin Hoti, ka shmangur përcaktimin e afateve të sakta kohore për finalizimin e këtij dokumenti, duke vënë theksin te rëndësia e nisjes së punës dhe cilësia e procesit. Ai po ashtu nuk ka zbuluar emrat e përbërjes së plotë të këtij grupi, por ka konfirmuar se drejtimi i tij do t'i besohet zëvendëskryeministrit Glauk Konjufca. “Qeveria është përkushtuar që të themelojë një strategji. Në krye të grupit do të jetë zv/kryeministri Glauk Konjufca, në mënyrë që ne të mbrojmë udhëheqësit tanë të luftës së gjenden në Hagë. Ne vetëm kemi themeluar Grupin Punues, do të ketë edhe përfaqësim institucional dhe parlamentar,” deklaroi Hoti gjatë konferencës për media pas mbledhjes së qeverisë. Më tej, ai sqaroi se ky mekanizëm do të shërbejë për bashkërendimin e mbështetjes juridike, diplomatike dhe institucionale gjatë procedurave të Apelit. Sipas tij, ky vendim përbën konkretizim të zotimeve të mëparshme të ekzekutivit për të vënë në dispozicion të gjitha mundësitë në mbrojtje të drejtësisë dhe të vërtetës historike. Duke folur për afatet, Hoti përsëriti se ato kushtëzohen nga rrethana të ndryshme, ndërsa prioriteti mbetet kujdesi institucional. “Për ne është e rëndësishme që të fillojë, të trajtohet në radhë të parë, të mos bëjmë gabime të mundshme siç i kemi parë, që të ngutemi,” u shpreh ai. Në fund, ministri e cilësoi vendimin dënues ndaj katërshes si të padrejtë, duke ritheksuar se lufta e UÇK-së ka qenë mbrojtëse për popullin e Kosovës dhe se ajo nuk mund të jetë kurrë subjekt gjykimi.