Behrami: Gjykata Speciale po i cilëson viktimat e pretenduara të UÇK-së si kundërshtarë të shtetësisë

Deputeti i Partisë Demokratike të Kosovës (PDK), Artan Behrami, ka bërë sërish një reagim publik lidhur me vendimin e fundit të Gjykatës Speciale në Hagë. Nëpërmjet një postimi në rrjetet sociale, ai ka analizuar përmbledhjen e verdiktit të trupit gjykues, duke e cilësuar atë si skandaloz në interpretimin e historisë së luftës. “Trupi Gjykues, në përmbledhjen e verdiktit, thotë se UÇK-ja, për të arritur qëllimin e saj për pavarësinë e Kosovës, ka përdorur forcë kundër të gjithë atyre që kanë qenë kundër pavarësisë,” ka shkruar ndër të tjera deputeti Behrami. Më tej, ai ka shtuar se ky interpretim përbën një shtrembërim të rëndë të realitetit, duke përfunduar me konstatimin se: “Me fjalë të tjera, Gjykata Speciale i konsideron viktimat e pretenduara të UÇK-së si njerëz që kanë kundërshtuar pavarësinë e Kosovës!”