Përballja e madhe në Vjenë, Foda dhe Vojvoda paralajmërojnë gatishmërinë e Kosovës ndaj Austrisë

Kombëtarja e Kosovës është gati për sfidën e radhës në Ligën e Kombeve, ku do të matë forcat me Austrinë në tokën vjeneze. Para këtij dueli të rëndësishëm, përzgjedhësi Franco Foda dhe mbrojtësi Mërgim Vojvoda dolën para mediave për të ndarë pritshmëritë e tyre. Ndeshja mes dy Përfaqësueseve do të luhet nesër mbrëma në Vjenë, duke shënuar kështu paraqitjen e dytë të "Dardanëve" në këtë cikël garues. Trajneri gjerman u shpreh i vetëdijshëm për vështirësinë e takimit, por theksoi se grupi është përgatitur maksimalisht. “E kemi analizuar lojën e tyre. I njoh disa lojtarë që kanë luajtur kur isha unë. E di çfarë na pret. Austria luan në mënyrë agresive, bën presion të lartë, prandaj duhet të bëjmë kundërpresion. Ne jemi të përgatitur, por në fushë do të vendosin detajet”, ka deklaruar Foda. Tekniku i njohur përsëriti qëndrimin e tij se austriakët hyjnë si favoritë absolutë të grupit, megjithatë beson fuqimisht te mundësitë e skuadrës së tij për të dalë me rezultat pozitiv pas triumfit ndaj Irlandës. “Kam thënë edhe më herët se Austria është favorite e grupit. Është e mundur që gjithçka të ndodhë nesër. Ne fituam ndaj Irlandës dhe do të bëjmë më të mirën nesër. Të luajmë me agresivitet, si zakonisht. Kemi shumë tifozë kosovarë në stadium, kemi vetëbesim, kemi fituar ndeshjet e tjera si mysafir. Nesër do të bëjmë një lojë të mirë”, u shpreh ai. Në të njëjtën linjë me trajnerin është shprehur edhe mbrojtësi Mërgim Vojvoda, i cili konfirmoi atmosferën pozitive dhe gatishmërinë e plotë brenda kampit dardan për këtë përballje. Futbollisti theksoi se ambicia afatgjatë e Kosovës mbetet sigurimi i një biletë për në një turne të madh ndërkombëtar. “Ekipa është në gjendje të mirë dhe jemi gati për nesër”, tha ai. “Synimi gjithmonë ka qenë që të kualifikohemi në një turne të madh. Pak nga pak jemi afruar, por shpresoj që tani me Ligën e Kombeve të kemi një shans më shumë në play-off. Austria ka eksperiencë dhe favorit, por edhe ne i kemi shanset tona”, ka pohuar Vojvoda. Dueli ndërmjet Austrisë dhe Kosovës është planifikuar të nisë në orën 18:00.