Kimberly Guilfoyle paralajmëron përfundimin e misionit diplomatik në Greqi, hedh poshtë akuzat për keqpërdorim

Ambasadorja e Shteteve të Bashkuara në Greqi, Kimberly Guilfoyle, ka lënë të kuptohet se karriera e saj diplomatike në këtë post po i afrohet fundit. Megjithatë, ajo ka theksuar se angazhimi i saj politik mbetet i palëkundur, duke rikonfirmuar mbështetjen e plotë për presidentin Donald Trump dhe vizionin e tij “America First”. Në një mesazh të publikuar në platformat sociale, Guilfoyle u shpreh se, pavarësisht mbylljes së mundshme të mandatit, përkushtimi i saj ndaj presidentit dhe interesave kombëtare të Amerikës mbetet i përjetshëm. Ajo e përshkroi përfaqësimin e Uashingtonit në Athinë si një privilegj të rrallë, duke shprehur mirënjohje për besimin e treguar nga presidenti Trump dhe sekretari i Shtetit, Marco Rubio. Në të njëjtën kohë, diplomatja amerikane ka reaguar ashpër ndaj pretendimeve për sjellje të pahijshme dhe shkelje ligjore, duke u zotuar se do të ndërmarrë të gjitha hapat e nevojshëm për të mbrojtur integritetin dhe reputacionin e saj profesional. Kjo deklaratë vjen pas vendimit të Shtëpisë së Bardhë për t’i kërkuar largimin nga detyra. Lëvizja e administratës amerikane pasoi raportimet se Guilfoyle dyshohet se ka kërkuar përfitime financiare nga një donator politik, në këmbim të mundësimit të kontakteve me zyrtarë të lartë të qeverisë. Guilfoyle i ka hedhur poshtë kategorikisht këto akuza, duke i cilësuar ato si të pabaza.