Bajrami godet Qeverinë: Mbi 60% e investimeve kapitale mbetën në letër deri në qershor

Deputetja e Lidhjes Demokratike të Kosovës (LDK), Hykmete Bajrami, ka adresuar kritika të ashpra ndaj ekzekutivit lidhur me procesin e rishikimit të buxhetit për vitin 2026. Sipas saj, ky proces është formal dhe nuk reflekton nevojat reale të institucioneve. Bajrami ka vënë në pah se, përkundër emërtimit që Qeveria i ka dhënë këtij procesi, në praktikë asnjë organizatë buxhetore përveç Ministrisë së Financave nuk ka pasur hapësirën e nevojshme për të rishikuar buxhetin e saj. Ajo theksoi se gjatë gjashtë viteve në pushtet, Lëvizja Vetëvendosje nuk ka ndërmarrë asnjëherë një rishikim të mirëfilltë dhe gjithëpërfshirës të buxhetit. Si dëshmi për dështimin në menaxhimin e fondeve, deputetja e LDK-së iu referua të dhënave zyrtare të Ministrisë së Financave. Ajo bëri të ditur se raporti gjashtëmujor i shpenzimeve dëshmon një gjendje alarmante, ku më shumë se 60 për qind e projekteve kapitale nuk kishin shënuar asnjë progres, duke pasur një normë realizimi prej 0 për qind deri më 30 qershor. “Sot, në shumicën e komisioneve parlamentare, në rend dite ishte shqyrtimi i Projektligjit për Ndryshimin dhe Plotësimin e Ligjit për Ndarjet Buxhetore për vitin 2026. Qeveria po e quan këtë rishikim të buxhetit, por në fakt asnjë organizatë tjetër buxhetore përveç Ministrisë së Financave nuk ka pasur mundësi ta rishikojë buxhetin e saj. Për gjashtë vite në pushtet, Lëvizja Vetëvendosje nuk ka bërë asnjëherë rishikim të mirëfilltë të buxhetit. A ka pasur nevojë për një rishikim të mirëfilltë të buxhetit këtë më se miri e thotë vetë Ministria e Financave përmes raporteve të saj. Sipas raportit gjashtëmujor të shpenzimit të buxhetit mbi 60% e projekteve kapitale normën e realizimit deri me 30 qershor e kanë 0%”, deklaroi Bajrami.